مکتبہ حافظ احمد یارؒ سے قرآن حکیم کے چند نسخے از ڈاکٹر نضرۃ النعیمْ - پروفیسر حافظ احمد یارؒ ۔ ترکیبِ قرآن ۔ لغات و اعرابِ قرآن

مکتبہ حافظ احمد یار سے قرآن حکیم کے چند نسخے

ڈاکٹر نضرۃ النعیم

ْْْْْْْْْْْْْْقرآن پاک میں حضرت ابراہیم ؑ کی دعا یوں بیان کی گئی ہے۔

وَلَا تُخْزِنِيْ يَوْمَ يُبْعَثُوْنَ ۔ۙيَوْمَ لَا يَنْفَعُ مَالٌ وَّلَا بَنُوْنَ ۔ۙاِلَّا مَنْ اَتَى اللّٰهَ بِقَلْبٍ سَلِيْمٍ ۭ الشعراء (۲۶: ۸۷۔۸۹)
یعنی قلب سلیم اللہ کی ایسی نعمت ہے کہ جسے عطا کیا گیا وہی یقینا دنیا و آخرت میں کامیاب لوگوں میں شامل ہو سکتا ہے۔ یہی وہ قلب سلیم ہے جو اللہ تعالیٰ نے پروفیسر حافظ احمد یار صاحب کو عطا فرمایا اور آپ نے ۲۳ سال کی عمر میں قرآن کریم حفظ کرنے کا اعزاز حاصل کیا چونکہ قرآن کریم خود اپنے ذوق و محبت سے حفظ کیا تھا اس لئے آپ کے دل میں ہر آے والے دن میں قرآن سے محبت بڑھتی چلی گئی یہاں تک کہ خادم قرآن ہو نا آپ کے نزدیک بلند ترین مقام پر ٹھہرا۔ آپ نے قرآن کو پڑھا، سمجھا دوسروں کو پڑھایا اور دنیا کے مختلف ممالک میں رائج قرآن پاک کی مختلف نسخے جمع کرنے شروع کئے قرآن کریم کے مختلف رسم الخط میں آپ کی دلچسپی اتنی بڑھی کہ آپ نے مجلس اسلامیات اسلامیہ کالج (سول لائنز) لاہور کے زیر اہتمام ۱۶ شوال المکرم ۱۳۸۳ھ بمطابق یکم مارچ ۱۹۶۴ء کو اسلامی خطاطی کی نمائش کا اہتمام کیا ۔

اسلامی خطاطی کی کامیاب نمائش کے بعدآپ نے ۱۹۶۶ء میں قرآن کریم کے مختلف نادر اور قدیم نسخوں کی نمائش کا اہتمام بھی لاہور میں کیا، اس نمائش کے بعد آپ نے دنیا بھر میں مختلف تراجم اورخصوصیات کے حامل قرآن مجید جمع کرنے شروع کئے اور آپ کا یہ شوق ساری عمر جاری رہا۔ آپ کے دوست بھی آپ کو قرآن مجید تحفہ دینا بہت پسند کرتے تھے اس طرح آپ کے پاس دنیا بھر سے مختلف قرآن پاک موجود تھعے جن کے رسم اور ضبط میں بہت تنوع پایا جاتا ہے۔ یہاں ہم آپ کے پاس موجود قرآنی نسخوں میں چند کا ذکر کریں گے۔

اردو تراجم والے قرآن کریم

٭ قرآن کریم کا قدیم نسخہ جس کا ضبط ورسم بر صغیر پاک و ہند میں رائج ضبط و رسم کے مطابق ہے اس کے کاتب مرزا محمد علی ہیں یہ ۱۲۸۹ھ میں شائع ہوا اور اس کی تصیح مولوی نور محمدؒ اور مولوی محمودؒ نے کی ہے۔

ْ٭ قرآن پاک کا ایک نادر و قدیم نسخہ جس کا اردو ترجمہ و تفسیر مولوی نذیر احمد ؒ صاحب نے کیا۔ یہ مطبعتہ انصاری دہلی سے ۱۳۱۴ھ میں شائع ہوا اس کے ناشر مولوی عبدلحمید صاحب ہیں۔

٭ تاج کمپنی کا شائع کردہ قرآن کریم کا نسخہ جس میں بیک وقت دس معروف و مشہور علماء کے اردو تراجم و تفاسیر شامل ہیں۔ اس میں ہر آیت کے نیچے دس لائینوں میں دس اردو ترجمے موجود ہیں۔

٭ تاج کمپنی نے مولانا اشرف علی تھانویؒ صاحب کا مختصر اردو ترجمہ و تفسیر کے ساتھ بیان القرآن کے نام سے شائع کیا اس قرآن پاک کی طباعت انتہائی خوبصورت رنگوں سے مزین کی گئی ہے۔

٭ دارالتصنیف کراچی کا مطبوعہ قرآن پاک جس کی کتابت منشی سید ممتاز علی صاحب المعروف مہاجر مکی نے کی

ہے۔ دارالتصنیف کراچی ہی کا مطبوعہ شیخ الھند مولانا محمود الحسن کے ترجمہ اور مولانا شبیر احمد عثمانی کی تفسیر پر مبنی قرآن مجید۔

٭ شمس العلماء مولوی حافظ نذیر احمد کے اردو ترجمہ و تفسیر پر مبنی قرآن پاک جو تاج کمپنی نے شائع کیا۔

٭ محمود اینڈ کمپنی بمبئی کا شائع شدہ حضر ت مولانا عبد الکریم پاریکھ کے اردو ترجمہ و تفسیر والا قرآن پاک۔

٭ مولانا رضا خان بریلوی کے اردو ترجمہ و تفسیر والا قرآن پاک جو تاج کمپنی نے شائع کیا۔

٭ مولانا فتح محمد خان جالندھری کا اردو ترجمہ و تفسیر والا قرآن پاک جو تاج کمپنی نے فتح الحمید کے

نام سے شائع کیا۔ یہ نسخہ اپنے خوبصورت رنگوں والے حاشیہ کی وجہ سے ممتا زہے۔

٭ تاج کمپنی کا شائع کردہ دو تراجم پر مبنی قرآن کریم، پہلا لفظی ترجمہ شاہ رفیع الدین محدث دہلوی کا ہے اس کی تفسیر موضح القرآن شاہ عبد القادر نے تحریر کی ہے۔ دوسرا بامحاورہ ترجمہ و تفسیر فتح محمد خان جالندھری کا ہے۔

٭ شاہ عبد القادر کے ترجمہ اور تفسیر پر مبنی رنگدار ، خوبصورت ایڈیشن بڑے سائز میں تاج کمپنی نے شائع کیا ہے۔

انگلش تراجم والے قرآن کریم

٭ ترکی سے طبع شدہ قرآن پاک کا نادر نمونہ جو مئی ۱۹۷۸ء میں شائع ہوا، اس کا انگلش ترجمہ و تفسیر ڈاکٹر محمد محسن خان اور ڈاکٹر تقی الدین الھلالی نے کیا ہے اس کا رسم و ضبط مشرق وسطیٰ میں رائج رسم و ضبط ہے۔

٭ قرآن پاک کا انگریزی ترجمہ عربی متن کے بغیر، یہ ترجمہ الحاج الحافظ غلام سرور کا ہے اور اسے نیشنل بُک فائونڈیشن نے ۱۹۷۳ء میں شائع کیا ہے۔ ٭ عبد اللہ یوسف علی کے انگریزی ترجمہ وتفسیر والا قرآن پاک جو اسلامک سینٹر واشنگٹن سے اپریل ۱۹۳۸ء میں شائع ہوا۔ ٭

The Message of Quran۔

محمد اسد صاحب کا انگریزی ترجمہ و تفسیر والا قرآن پاک جو دارالأندلس جبرالٹر سے ۱۹۸۰ء میں شائع ہوا۔

٭ قرآن پاک کا انگریزی ترجمہ عربی متن کے بغیر ، یہ ترجمہ لال محمد چاولہ کا ہے۔

٭ تر٭ تاج کمپنی کا اردو اور انگریزی دونوں زبانوں میں ترجمہ والا قرآن پاک ، انگریزی ترجمہ محمد مارمدیوک پکتھال جبکہ اردو ترجمہ مولانافتح محمد کا ہے۔

فارسی تراجم والے قرآن کریم

٭ قرآن کریم کا نادر ایرانی نسخہ جس کا ترجمہ و تفسیر دانشمند محترم مھدی الھی قمشہ ای نے کیا ہے اس کی پرنٹنگ انتہائی خوبصورت ہے یہ شعبان ۱۳۹۵ھ میں شائع ہوا، مصحف کا وزن تقریباً ۱۰ کلو گرام ہے اور اس کا سائز 11.5 x 17.5انچ ہے۔

٭ آقائی محمد کاظم نے معزی کے فارسی ترجمہ و تفسیر سے مزین قرآن پاک جو جمادی الأخری ۱۳۷۷ھ میں شائع ہوا۔

٭ حضرت شاہ ولی اللہ محدث دہلوی کے فارسی ترجمہ والا قرآن کریم جو تاج کمپنی نے شائع کیا۔ قرآن مجید جس کا رسم الخط نستعلیق ہے اس کی کتابت سید حسین میر خانی نے کی ہے اور یہ رجب ۱۳۸۵ھ میں شائع ہوا۔

٭ قرآن مجید کا نادر و قدیم نسخہ جو اردو اور فارسی تراجم سے مزین ہے اردو تفسیر عباسی اور فارسی تفسیر حسینی ہے یہ مطبعۃ أنوری أکبر آباد سے ۱۳۱۵ھ میں شائع ہوا۔

٭ مصحف شریف فارسی تراجم کے ساتھ ایران سے طبع شدہ قرآن پاک، یہ فارسی ترجمہ آقائی شیخ مہدی کا ہے۔ اس قرآن پاک کے ایک صفحہ پر قرآن کا متن اور دوسرے صفحے پر سامنے ترجمہ دیا گیا ہے۔ یہ قرآن پاک ۱۳۹۵ھ میں شائع ہوا۔

٭ فارسی اور اردو دونوں زبانوں میں ترجمہ والا نادر اور قدیم قرآن پاک۔ اس قرآن پاک میں ایک فارسی اور دو اردو ترجمے موجود ہیں یہ ترجمہ شاہ رفیع الدین ا ور مولانا عبد القادر صاحب کے ہیں۔ یہ قرآن پاک مطبعۃ مجتبائی دہلی سے ۱۲۸۳ھ میں شائع ہوا۔

عربی تراجم والے قرآن پاک

٭ قرآن پاک کا نادر اور قدیم نسخہ جو ترجمہ کے بغیر عربی حاشیہ کے ساتھ ہے۔ اس کی تصحیح حافظ محمد

مکی، مولوی قاری سراج الحق اور مولوی نصیر نے کی ہے، یہ مطبعۃ الصفدری بمبئی سے ۱۹ صفر ۱۳۰۴ھ میں شائع ہوا۔

ھندی ترجمہ والا قرآن

٭ ھندی ترجمہ والا یہ قرآن کریم مولانا خواجہ سید حسن نظامی نے ۱۹۲۹ء میں شائع کروایا۔

مختلف ممالک میں شائع ہونے والے قرآن کریم

٭ قرآن پاک کے کچھ نسخے ایسے بھی ہیں جن کا ضبط اور رسم چینی تحریر سے مشابہ ہے قرآن پاک کا یہ نسخہ پروفیسر حافظ احمد یار صاحب کو ان کے دوست مولانا مفتی محمد حسین نعیمی صاحب نے ۱۹۸۵ء میں چین سے تحفہ لا کر دیا۔

٭ اسی طرح چینی رسم الخط سے مشابہ (کتاب خطب) یعنی خطبوں کی کتاب بھی آپ کی لائبریری میں موجود ہے۔ جو مطبعۃ مومن و شرکاء شنگھائی سے شائع ہوئی اس کتاب کے ناشر الجمعیۃ الاسلامیہ الصینیۃ ہیں ۔ یہ کتاب جون ۱۹۶۶ء میں پنجاب یونیورسٹی آنے والے چینی وفد کے ایک رکن نے آپ کو تحفہ دی۔

سعودی عربی میں چھپنے والے قرآن پاک

٭ مجمع الملک فھد للطباعۃ المصحف الشریف المدینۃ المنورۃ

٭ برصغیر پاک و ہند کے رسم الخط کے مطابق چھپا ہوا قرآن پاک

٭ سعودی عرب اور شام میں رائج رسم و ضبط کے مطابق نسخہ

٭ انگریزی ترجمہ و تفسیر والا قرآن پاک

٭ ڈاکٹر محمد تقی الدین الھلالی اور ڈاکٹر محسن خان کے انگریزی ترجمہ والا قرآن پاک

٭ قرآن پاک کا خوبصورت نسخہ جس کا ترجمہ شیخ الھند مولانا محمود الحسن کا ہے اور تفسیر مولانا شبیر احمد عثمانی کی ہے۔

مشرق وسطیٰ میں رائج رسم و ضبط کے مطابق شائع شدہ قرآن پاک

٭ طبع والنقل والا قتباس دارالشامیۃ بدمشق۔ اس قرآن پاک کے ہر صفحہ کے آخر میں حاشیہ

پر اگلے صفحے کا پہلا لفظ لکھا گیا ہے تاکہ دورانِ قراء ۃ کوئی صفحہ پڑھنے سے رہ نہ جائے۔

٭ شام، مصر، سعودی عرب اور اُردن کے ادارۃ الأفتاء والبحوث کے تمام علماء کرام کے اتفاقِ رائے اور اجازت سے شام میں ۱۹۷۷ء میں شائع ہونے والے قرآن پاک جس کے حاشیہ میں تفسیر ہے اور پورے قرآن پاک میں اسم الجلالۃ سرخ روشنائی سے شائع کیا گیا ہے۔

٭ رسم عثمانی میں شائع قرآن کریم جس کی کتابت مکی بن أبی طالب القیسی (۳۵۵۔ ۴۳۷ھ) نے کی ہے۔

٭ العمدۃ فی غریب القرآن الکریم بالرسم عثمانی

٭ المصحف المعلم بتجوید الحروف و معرفۃ الوقوف

اس قرآن کریم میں مختلف رنگوں کے ذریعے وقف اور تجوید کی تطبیق کی علامات کو نمایاں کیا گیا ہے۔
دیگر قراء ات میں مختلف ممالک میں چھپے ہوئے قرآن مجید

٭ قراء ۃ ورش عن نافع سے مزین یہ قرآن مجید دارالکتاب اللبنانی۔ بیروت لبنان سے شائع ہوا۔

٭ القرآن الکریم علی روایۃ الامام قالون۔ یہ قرآن کریم رمضان ۱۳۹۷ھ میں تونس سے شائع ہوا۔

٭ مصحف شریف بروایۃ الامام ورش۔ یہ قرآں کریم الأمارات العربیہ المتحد ۃ ابو ظہبی سے ۱۳۸۹ھ میں شائع ہوا۔

٭ القرآن الکریم بروایۃ قالون عن نافع۔ یہ قرآن مجید ۱۴۰۳ھ میں تیونس سے شائع ہوا۔

٭ القرآن الکریم بروایۃ الامام قالون۔ یہ قرآن پاک رسمِ عثمانی میں ہے جسے حافظ ابو عمر و الدانی نے اختیار کیا۔ یہ قرآن پاک ۱۳۹۵ھ میں طرابلس لیبیا سے شائع ہوا۔

٭ القرآن الکریم بروایۃ الامام ورش۔ یہ قرآن مجید ۱۳۶۵ھ میں تیونس سے شائع ہوا۔

٭ القرآن الکریم بروایۃ الامام ورش۔ یہ مراکش سے شائع ہوا۔

٭ شمالی افریقہ کے رسم الخط پر چھپا ہوا قرآن کریم جو انداز ڈیڑھ سو سال پرانا ہے۔

٭ گھانا سے طبع شدہ قرآن پاک۔ یہ قرآن پاک مکتبہ غینیا (گھانا) افریقہ سے شائع ہوا۔

٭ القرآن الکریم ۔ یہ قرآن پاک ۱۳۹۵ھ میں مطبعۃ الاتحاد برلن جرمنی سے شائع ہوا پہلی مرتبہ یہ قرآن کریم استنبول میں ۱۳۴۷ھ میں چھپا تھا۔ کاتب کا نام بدیع الزمان سعید نورسی ہے۔

٭ القرآن الکریم۔ برسم عثمانی المعروف مصحف مصطفی الحلبی۔ یہ قرآن مجید جامعۃ الأزھر مصر سے ۱۹۶۵ء میں شائع ہوا۔

٭ القرآن الکریم۔ اس قرآن پاک کی کتابت مولانا محمد غوث پشاوری (المتوفی ۱۲۱۲ھ )نے کی ہے۔ آپ نے قرآن پاک کی کتابت کے ساتھ ساتھ دوسرے قلم سے علمی اقوال اور تفسیری جملے مختلف تفاسیر سے نقل کر دئیے ہیں۔ اقوال کے آخر میں تفسیر کا نام بھی درج کر دیا گیا ہے۔

٭ القرآن المجید۔ مصحف سیدنا عثمانؓ، اس قرآنالکریم کی فوٹو کاپی سمر قند میں موجود نسخہ قرآنی کی ہے۔ اس کی تدوین ڈاکٹر محمد حمید اللہ صاحب نے ۱۹۸۱ء میں کی اور یہ قرآن پاک (فوٹو کاپی) المرکز الثقافتی الاسلامی فلا ڈیلفیا امریکہ سے تقسیم کیا گیا۔

٭ قرآن پاک کا منفرد نسخہ جس کی ہر سطر الف سے شروع ہوتی ہے اور تمام ۱۱۴ سورتوں کی بسم اللہ الرحمن کی خطاطی مختلف ہے۔ مصحف کے شروع میں ایام نبوی سے ۴۰۔۴۱ھ تک کے مصاحف کے کچھ نمونوں کی تصاویر بھی دی گئی ہیں۔

٭ عکسی تجویدی قرآن مجید۔ اس قرآن پاک میں موجود جو علامات ضبط استعمال ہوئی ہیں وہ مولوی ظفر اقبال سیالکوٹی نے وضع کی ہیں۔ پاکستان میں صحیح تجوید پرتوجہ دینے کے لئے یہ ایک منفرد اور بے مثال کاوش ہے۔ اللہ تعالیٰ اس کوشش کو قبول فرمائے۔ آمین۔